投資產品:ETF

係好早前就講過唔同類型的股票﹐今次就都係講股票﹐但就唔係一隻股票﹐而係集一堆股票而成的投資產品:ETF(Exchange Traded Fund)。

ETF﹐中文叫交易所買賣基金﹐個名其實就已經講左ETF唔少特性

一：交易所買賣﹐姐係話同一般買賣股票係無分別﹐會有自己的號碼

二：基金﹐等同一般的基金係會有收費

ETF最早出現就當然係喺美國﹐但其實香港推出都唔係遲過美國好多﹐原因就要講到97金融風暴。呢到就唔講歷史﹐有興趣就去以下網頁了解下：連結

係香港最出名的ETF就當然係盈富基金(2800.hk)

盈富基金入面所持有的股票比例係會完全跟足香港恆生指數(恆指)成份股的比例﹐直接複製恆指每日的變動。所以恆指上升下跌幾多百分點﹐理論上盈富基金都會照番咁的變動。

(PS:如果有睇過之前的文﹐都會見到Blog主直接用盈富基金就當係恆指的變動同埋回報)

恆指同盈富基金的五年回報圖﹐兩者只係差0.4%﹐就係因為基金的收費

來源:Google Finance 

ETF主要可以分為兩類﹐一類為傳統的實物資產持貨。上面提過的盈富基金就係傳統的ETF﹐另一隻傳統的ETF就係SPDR黃金(2840.hk)

另一類ETF係以透過金融衍生工具去""模擬""所追蹤的指數﹐同實物ETF唔同﹐佢地背後係唔會有相關的資產去做支持。其中一隻就係安碩A50 (2823.hk)

係近呢幾年﹐已經有唔同類型的ETF產品係港交所上市﹐甚至出現有槓桿效應同埋反向的ETF產品:

槓桿ETF:會有標明槓桿的倍數﹐如果所追蹤的相關指數升(跌)1%﹐咁槓桿ETF""理論上""就會按照倍數而升(跌)幾多百分點

反向ETF:都會有標明反向的倍數如果所追蹤的相關指數升(跌)1%﹐咁反向ETF""理論上""就會按照倍數而跌(升)幾多百分點

暫時係香港的槓桿ETF最大倍數係2倍﹐而反向ETF就只係-1倍。佢地都係用唔同的金融衍生工具去製造相關的槓桿

可以見到有唔同的槓桿同反向ETF產品﹐會指出該ETF產品係追蹤邊個指數

(來源: aastock 連結)

但要留意的係呢D槓桿同反向ETF產品只係短期內可以按照相關倍數放大﹐當長時間持有的話係唔會跟得足個倍數。所以唔建議一個無相關認知的人去買入。

咁對於一隻ETF產品﹐有咩地方要留意？
1.流通量
ETF同股票一樣﹐需要有買方同賣方先成到交易。而由於係香港的ETF交易市場無其他成熟市場咁大﹐有唔少的ETF係流通量方面較差﹐係買賣方面會較難

2.價差
呢到所講的價差係指ETF本身所持貨的價值同你係交易所買賣的價錢兩者的相差。姐係本身一件值十蚊的貨你要用十一蚊先買到﹐又或者只可以姒九蚊賣出。出現呢個情況的主要原因其實同流通量有關。一單交易要有買家有賣家﹐如果多買賣對手﹐咁係本身價值同買賣價格方面就唔會有咁大分別(有大分別就自然有投機者進行買賣﹐較為複雜不作詳細解釋)。但如果流通量低﹐好容易就會出現呢個價差。如果係極端情況下仲可能會大幅度的溢價或者折讓先可以完成交易


咁買ETF有咩好處？
1.跟蹤大市
(絕大部分)ETF係屬於被動型的管理基金﹐本身發行時已經會指出跟蹤邊個相關指數/資產﹐所以ETF的表現係會緊貼指數/資產的表現

2.收費比主動型低好多
一般的主動型基金由於會有基金經理打理並且會有不少的雜費同埋開支﹐因此收費大多都超過1%甚至2%以上﹐長期落去會好影響整體的回報。但ETF由於唔會經常有大改變﹐而且屬被動型﹐只會係相關指數作出變動時先會作出買賣﹐因此收費會比主動型基金低好多﹐例如盈富基金的收費只係0.2%左右﹐而係美國﹐唔少ETF的收費已經下跌至0.1%以下

3.一次過持有多隻股票
如果你想持有多隻股票﹐好可能需要唔少錢﹐但因為ETF本身就係持有一大堆唔同公司股票﹐因此買ETF就等同一次過持有唔同公司的股票


大致講到咁多﹐如果大家想了解更多﹐可以睇下以下的網頁:

認識交易所買賣基金
(來源:香港交易所)

ETF 投資的好處與風險
(來源:stockfeel股感知識庫)