又到左三月﹐姐係又到左上市公司出全年業績的時間﹐今次要寫的就係港鐵。其實寫港鐵都寫過幾次﹐而今次都係第二次寫佢全年業績。同大家一齊睇下佢盤數靚唔靚
首先係收入
香港客運業務收入
香港客運業務收入升左7%至194.9億﹐比17年只係升3%就當然增長左唔少。當然其中一個原因就係港鐵係17年無加價而18年的下半年加番價﹐總共就加左3%。
本地鐵路服務總乘客人次就升左2%。另外就係因為18年有左高鐵收入而17年係無。如果要準確比較17年﹐將高鐵收入係18年拎走的話﹐咁18年客運業務收入就係升左4%。
2018年綜合消費物價指數按年變動2.5%﹐係2018年第三季的運輸業工資指數按年變動係5.8%(!!!!!!)﹐如果第四季都係咁高的話咁港鐵就可以加4.15%(條式就係兩者加埋再除2)。當然最終唔會咁高﹐因為加幅唔可以大過月入中位數的按年升幅﹐但都幾肯定港鐵19年下半年都會再加價。
香港車站商務收入
香港車站商務收入升左8%至64.5億﹐呢部分姐係係地鐵站入面D商店﹐廣告牌同堆租比電訊商的收入﹐港鐵商場並唔係屬於呢一個部分。
車站零售設施租金收入升左6.8%﹐港鐵就話因為免稅店租金上升及車站商店數目增加﹐但港鐵無講到的一樣野係一般零售店個平均租金有無升到。
港鐵就咁講:
“截至2018 年12 月31 日，港鐵的車站商店數目達1,470 間，而零售設施的總面積為66,292
平方米，較2017 年12 月31 日分別增加54 間及7,576 平方米可出租面積﹐….”
照咁計﹐港鐵零售設施的總面積係18年增加左近13%﹐但個租金就只係增加左6.8%。當然無得咁樣直接用面積同租金掛鉤﹐但港鐵唔講平均租金的升幅就令Blog主懷疑零售設施的租金已經受到壓力。
當然高鐵又為港鐵帶黎新的商店同廣告牌﹐而港鐵都同時有講到 “ 零售業消費及旅遊業的進一步增長帶動市場情緒好轉(?)，使整體廣告支出繼續回升” 。
香港物業租賃及管理業務收入
呢部分就係所有商埸﹑寫字樓同埋物業管理的收入。
主要重點就係青衣城二期係18年開幕﹐可以提供到新的租金收入。而另外港鐵就仲可以係新合約中加租﹐雖然只係加到1.5%咁多。
中國內地及國際的鐵路、物業租賃及管理附屬公司收入
收入大數中增長最勁就係呢一部分﹐18年升左21%﹐而佢係盈利個部分就更突出(之後再講)。無論係收入定係增長主要都係黎自國際的鐵路業務。
港鐵現時係唔少地方都已經有鐵路營運或者維修服務﹐例如英國﹑瑞典同澳洲。最新的業務就係澳門的輕軌系統氹仔線。
其他業務收入
根據港鐵的分類, “與客運或物業業務沒有直接關連的業務，如「昂坪360」（包括營運東涌纜車及昂坪主題村有關業務）、鐵路顧問業務及提供予香港特別行政區政府（「香港特區政府」）的項目管理服務。”
Ngong Ping Sam-Luk-Ling (誤)
中國內地的物業發展收入
最後一個就係中國內地的物業發展收入﹐其實姐係港鐵係中國的賣樓收入。正如上一年的年報都已經講左﹐18年係唔會有任何的賣樓收入﹐所以跌足99%係好正常。
因此﹐就咁睇條大數好似差過17年﹐但如果唔計港鐵係中國的賣樓收入﹐18年收入係比17年升左11%﹐而且連客運業務都升到7%﹐Blog主就覺得幾滿意。
到左盈利部分
呢到比大家睇下港鐵自身業務的收入同相關的盈利﹐另外整多一張計埋個EBIT 毛利率。
一整左張圖﹐就知道要講的就只有 “中國內地及國際的鐵路、物業租賃及管理業務”呢一部分﹐更準確黎講係國際的鐵路管理業務。
頭先都講到盈利部分好突出﹐因為國際鐵路業務收入係18年升左近22%﹐但盈利就不但無升而且仲下跌﹐而個EBIT毛利率就更加只有2.6%﹐出事的地方係港鐵係瑞典的業務。
瑞典可以話係港鐵其中一個主要的海外業務﹐只可惜一直都係蝕住做﹐而且並唔似香港咁容易管理。港鐵一直都以英國同瑞典作為例子推廣港鐵的海外營運﹐但係財務上瑞典就唔係一個好的參考﹐而港鐵都承認瑞典的業務仲要蝕多幾年。
另外一提的就係投資物業重估係18年只係得47億﹐比17年的63億少左近25%。咁都係好正常﹐18年的物業價格終於都開始見到有D壓力﹐無得再好似17年咁大幅上升。
雖然港鐵係香港的賣樓收入比17年有增長﹐但係投資重估同埋無左中國賣樓收入後令到港鐵係18年的利潤比17年低﹐但係來自經常性業務下利潤都仲係比17年有增長﹐所以可以話係比17年好。
派息方面就每股0.95港元﹐全年計比17年增長7.1%
今次睇港鐵的業績就暫時去到呢到﹐因為而家只係出左業績而未出年報﹐所以個堆業務回顧﹑展望都只係幾段就完﹐呢到就唔講了。
下次再同大家簡單拆解下業績
(ps:寫一篇都斷斷續續用左兩三日時間去寫﹐望大家多多分享)
戴頭盔時間
本人並非持牌人士，本人意見純屬分享。本文章不應視為任何投資之建議或邀請，投資涉及風險，如有疑問請諮詢專業投資意見
沒有留言:
張貼留言