談數碼通+香港的電訊市場

今篇文章唔係評價數碼通業績﹐而係一路分享業績睇法﹐一路講整個香港的電訊市場。

以下所有圖片﹐如無特別標示﹐都係來自數碼通中期報告2017/2018  連結

點解會無端端講數碼通？話說半年前寫左篇文講收息股的種類 連結﹐當中電訊股部分就cap左數碼通的股價走勢圖﹐話要小心賺息蝕價。

當時係17年9月。而家大半年過去﹐幅走勢圖就變成咁......

(來源: aastock) 

呢半年﹐數碼通一直都繼續潛水﹐直到近排先至係8蚊邊反彈番少少。因咩事會搞到咁？份中期報告都已經係一開頭的主席報告--業務回顧中講晒

1.本公司於2016年10月續期及取得額外的2100MHz頻譜，導致頻譜使用費攤銷增加

係香港﹐通訊頻譜係要公開拍賣由政府租比電訊商﹐仲係下下講緊幾億幾億去投。

手機網絡再洗牌？900/1800兆赫頻譜 六成將公開拍賣

(來源:蘋果日報)

由於數碼通係16年用左近10億新增左10兆赫頻譜(唔知咩黎就當係大氣電波的容量)﹐係會計準則下每年要增加流動通訊服務牌照費攤銷﹐攤銷幾耐？15年﹐至到2031年。因此:

流動通訊服務牌照費攤銷上升$29,000,000 或26% 至$143,000,000（ 2016/17 上半年：$114,000,000），是由於集團攤銷其續期和新增的2100MHz頻譜的流動通訊服務牌照費所致。

PS: 有興趣睇個次的競投結果﹐可以去睇以下eprice個Blog 連結同埋篇新聞稿 連結


2.其次，客戶較長的更換手機周期，令手機及配件的銷售額下降

呢個應該大家都變左係咁﹐部電話唔會話經常換﹐用到就繼續用住先。而且老實講﹐無論係蘋果定係三星﹐都已經無咩新的花款去吸引人換機﹐只係一味愛鬥大﹐仲邊吸引到人換機。

講起愛鬥大﹐自然諗起呢套戲

(來源: 網上)

但要留意的係電訊公司賣電話其實係無咩點賺錢﹐直頭可以話係貼錢做生意。

睇番份業績﹐手機及配件銷售同埋銷售存貨成本兩者係１７年只係賺三千萬﹐睇落都仲好似好多﹐但係仲有一個數要減——手機補貼之攤銷

咩叫手機補貼之攤銷？你上台出電話﹐好多時部電話有得平D甚至免費送比你﹐咁電訊公司就會將部電話以手機補貼形式去cover左個價值。咁做的目的當然係想係另一邊的月費去cover番﹐而且可以拉長合約期﹐增加收入。咁條數點計？部電話的價格就會按番背後的合約時段去做番個攤銷。假設4800蚊電話24個月合約﹐咁係手機補貼之攤銷呢一項就會每個月有200蚊去做攤銷﹐直至份合約到期。咁個補貼又係邊到黎？未就係你比的月費﹐姐係服務收入。

講到呢到﹐咁手機及配件銷售比上一年下跌左四成代表咩意思？未姐係少左人出新手機﹐導致手機收入下跌。可能你會話﹐咁唔係好事咩？唔使補貼wor﹐電訊公司可以袋晒所有收入。但唔好唔記得上台出機的其中一個目的就係要增加月費收入﹐剩上台的月費同出機的月費差好遠。因此較清晰倏做法係將服務收入、手機及配件銷售、銷售存貨成本三者合併一齊再同16年比較。咁的話17/18年就係25.6億﹐比16/17年同期跌左5.8%。

3.由於話音漫遊持續錄得結構性收入下跌，令漫遊收入減少，然而，數據漫遊收入的穩健增長，逐漸抵銷話音漫遊的跌幅，令整體漫遊收入的下跌速度放緩。

相信唔係好多人知咩係漫遊。

當你拎住部電話﹐係外地用電訊服務﹐包括打電話同上網﹐呢樣服務就係漫遊。點解收入下跌？而家仲邊有人會係外地就咁用自己部電話直接上網﹐都已經轉用儲值卡﹐甚至係租wifi蛋。每日都只係十幾蚊﹐電訊商每日幾十甚至過百蚊的漫遊貴用﹐消費者又點會唔識選擇。

而令股價係咁跌的原因仲有佢:

減派息!!!

無眼睇!!!

數碼通的業務比另外三間本地電訊公司簡單。香港作為一個彈丸之地﹐竟然有四間電訊公司﹐好容易就會估到競爭有幾大。可以講的係數碼通唔再係以前的數碼通﹐就好似同黎大鈞當年的霸氣一樣唔會再見到(如果你唔知咩事的話去google下黎大鈞的金句)。

而家的電訊市場已經由以前的貴plan出手機年代轉變成而家越平越好﹐因此而家市面不斷會有唔同的平價手機月費服務﹐平至百幾蚊已經有5gb一個月。例子當然係有香港寬頻(1310.hk)。其實香港寬頻係無自己的手提通訊網絡﹐佢係租用數碼通同埋中國移動(941.hk)的網絡。好處係唔使自己興建+營運+拍賣牌照費比政府﹐唔好處就當然係要睇人面色。可能以前香港的電訊市場太平靜﹐幾間獨大﹐當香港寬頻叉隻腳入黎後大家先開始驚﹐除左降低月貴外﹐仲不斷推出新服務﹐為左吸引客戶唔好流走(電訊服務客戶的粘性其實好低﹐轉去其他服務供應商又無付出)。所以導致到而家市面先會有平價手機plan 。

咁係未香港整個電訊市場都受壓？當然唔係﹐睇下對手香港寬頻的股價就知

(來源: aastock) 

《大行報告》摩通上調香港寬頻(01310.HK)評級至「增持」 升目標價至12元

摩根大通報告指出，香港寬頻(01310.HK)2018財年上半年經營表現強勁及業績走勢理想，有信心集團2018-20年累積每股經調整資金流達到2.1元至2.4元的目標，該行將其評級由「中性」上調至「增持」，目標價由10元升至12元，主要反映移動及企業業務盈測獲上調。

該行表示，移動及企業業務走勢強勁，儘管市場競爭激烈，移動用戶人數增加51%至22.2萬戶，單獨上台及綑綁計劃的每月每戶平均收入(ARPU)分別升至142元及311元(原為119元及268元)。企業業務方面，集團與新世界電訊整合後，公司網絡及營運能力均有所提升，從而可增加市場份額。

住宅寬頻方面，基於香港電訊(06823.HK)仍聚焦在訂戶數字及市場份額，該行認為集團難以顯著加價，料住宅寬頻收入增長僅中單位數。

(來源: aastock 連結)

點解香港寬頻成功？主要原因係因為佢一黎就搶客﹐再加上住宅寬頻業務強大﹐就算加價都唔怕流失客戶﹐當然咁係因為住宅寬頻唔似流動通訊咁有咁多選擇﹐一係佢﹐一係網上行。數碼通以前都有做住宅寬頻﹐但係一直都唔入流﹐到而家都唔知佢仲有無繼續住宅寬頻業務。

數碼通股價仲會唔會跌落去﹐Blog主無答案﹐但會唔會上得番到以前十幾蚊的股價﹐就咁睇佢的業務就應該唔會﹐連份報告都唔敢講收入可唔可以止跌﹐仲點期望會升。

**************************

註:點解Blog主會知電訊行業？

唔通做過又要話比你聽咩

Like + Share
可以的話仲可以click下廣告﹐等Blog主賺到三幾蚊

戴頭盔時間

本人並非持牌人士，本人意見純屬分享。本文章不應視為任何投資之建議或邀請，投資涉及風險，如有疑問請諮詢專業投資意見