拆解煤氣業務(一)

話說係連登討論區財經台有一個貼叫做"點解煤氣可以升到咁快。"連結

發現原來好多人仲停留煤氣的業務係剩得香港﹐因此為大家拆解煤氣整個業務﹐嘗試有幾仔細就幾仔細。

以下所有圖片如無指明都係來自以下年報

香港中華煤氣2017年年報 連結

港華燃氣2017年年報 連結

首先第一樣野比大家睇的係煤氣係主席報告中的第一段:

2017年集團之本港煤氣業務維持穩步增長，中國內地城市燃氣業務及新興環保能源業務發展良好，集團整體經常性業務業績增長理想。

煤氣係十幾年前已經開始進軍中國的燃氣市場﹐現時煤氣除左自己公司發展中國的煤氣市場外﹐仲另外持有另一隻上市燃氣公司港華燃氣(1083.hk)六成七的股權。兩者合埋係大陸的燃氣項目已經有一百三十幾個項目﹐唔好再單單話煤氣係一間香港公司。

而且煤氣的業務已經唔止係煤氣﹐煤氣仲持有國際金融中心大約16%的股權。國際金融中心貢獻幾多收入比煤氣？之後會拆解。(ps:煤氣其實仲有嘉亨灣和翔龍灣物業﹐不過應該都賣晒出街﹐所以唔會再係年報見到佢地個名)。

希望睇完呢篇文﹐你唔會再以為煤氣係一間剩係係香港提供煤氣的公司。

跟住正式睇佢盤數。

首先係香港的客戶數目同埋煤氣銷售量

可以見到係過去十年其實都一直升緊﹐客戶數目過去十年總共升左12%﹐而銷售量都升左5%。好多時大家都會聽到D人話唔睇好煤氣的原因係近年新樓大多都係用電煮食﹐煤氣唔會再有增長動力。但煤氣提出的數字就岩岩相反﹐指示黎緊幾年的住宅數目當中﹐公屋加居屋的數目係多過的私樓﹐而且都唔係所有私樓都無煤氣﹐因此煤氣的銷售仲可以keep住微量的增長。

(來源: 香港中華煤氣2017年業績簡報連結)

而且煤氣都有供氣供熱比唔少商業﹐煤氣都希望黎緊會有唔同的新計劃落成﹐包括迪士尼同海洋公園。

煤氣作為香港一間大型的供氣公司﹐開發新項目的增長永遠好過靠自然增長﹐所以煤氣都不斷推出度身訂造的服務﹐為求增加售氣量。

以下段片就係講點樣幫海洋公園提供恆溫服務

連結

之後就係大數﹐營業額同除稅後溢利

首先見到近十年都係增長緊﹐營業額同除稅後溢利平均每年都有10%同7.6%增長。另外要一提的係呢到的營業額﹐全部都係由煤氣係香港同大陸賣氣的收入﹐無其他的業務係入面(例如IFC)。港華燃氣的數就係除稅後溢利已經出現﹐之後會拆解。

睇完個營業額﹐為左比大家了解下煤氣係大陸業務的增長﹐幫大家拆埋營業額的來源:

由幅圖就已經顯示到大陸的燃氣業務有幾重要﹐由2012年的5成到左17年的6成﹐而香港燃氣業務收入就唔夠3成。所以煤氣已經唔再係一間香港公司﹐更唔好講佢仲有港華燃氣股份。

***************************************************************************
接住落黎下一篇會幫大家了解煤氣係大陸的業務﹐仲有佢的主要溢利但又唔係主要業務的業務﹐幾時會有？睇大家仲有無興趣睇落去

Like + Share＋Click
可以的話click下廣告﹐等Blog主賺到三幾蚊

戴頭盔時間

本人並非持牌人士，本人意見純屬分享。本文章不應視為任何投資之建議或邀請，投資涉及風險，如有疑問請諮詢專業投資意見