536貿易通

今日要講的係一個投資炒賣故事﹐呢個故事發生係15年底﹐大家可以當係故仔睇又得﹐當我吹水又得﹐主角係536貿易通。

相信呢隻股票好多人都未聽過﹐佢的業務主要係貿易文件的前端政府電子貿易服務﹐近年都有接觸保安方案的業務。一開始認識佢的原因係佢的高股息率(7厘幾)﹐但由於唔熟佢當時的業務﹐所以只係望過一眼。

之後就開始聽到佢接觸電子支票的業務﹐但當時只係話一直同銀行研究﹐未有正式公佈日子。

講電子支票點可以無陳豪

連結

到左某一排﹐Blog主就不斷收到銀行寄黎的信﹐話要修改客戶條款﹐一開頭都無理佢(有得點理﹐最多唔用姐)。但有一次就突然好得閒去望下個堆密密麻麻的條款﹐就比Blog主見到呢四隻字-----電子支票

當然Blog主就即刻搵下市場有無其他相關的消息﹐係無!!!!!

咁的發達機會唔係咁易有。

銀行改條款﹐背後就當然預期會有野發生﹐唔通會屎忽痕去改咩。照咁睇姐係話銀行應該會好快推出電子支票﹐如果係的話咁應該會對貿易通係一件好利好的消息。當時就搵番佢份年報同新聞去睇﹐當時都仲話同銀行合作中。雖然當時都仲對佢係未推出有懷疑﹐但認為銀行改得條款﹐應該會就快推出。因此當時就用左幾萬蚊去買佢﹐預計只會係短炒而唔會長揸。

當時買入平均價係1.5x﹐話明短炒﹐就當然唔會keep佢咁耐﹐更加唔想由短炒變長揸。可惜的係世事永遠同你預期的唔同.....

貿易通並唔係一隻好流通的股票﹐每日的成交都只係幾十萬股﹐一次過買幾萬股就變成市場大戶﹐因此就推高左幾格股價(好難得成為一個市場主要買家)。但買左之後股價就不斷下試1.5﹐無耐就仲穿左1.5。唔使一個月就坐左艇﹐賬面輸緊7%。

呢個時候﹐你就會問自己仲繼唔繼續持有﹐市場又仲未有公佈消息﹐股價又無咩支持。又係一個止唔止蝕的問題﹐背後仲係對自己的信任問題。

等左大約兩個月後﹐就係15年11月底﹐終於比我等到

金管局：港電子支票 下月正式推出
來源:蘋果

而貿易通的股價﹐也都開始火箭式上升至2蚊﹐正所謂buy on rumour sell on news﹐係接近高位時賣晒所有貨。係未賺好多？唔係﹐都只係賺兩萬幾蚊﹐一個月人工多D。

咁點解會講起佢？因為無意間見到有文章介紹佢作為一隻高息股﹐近期再睇番佢的股價﹐1.28......

而電子支票係香港都唔見得好普遍﹐佢的其他業務就更加一沉不起。股價就當然係咁跌。

呢D咁的炒賣機會可一不可再﹐而Blog主之後都無再有咁的機會可以比市場更早發掘到短炒機會。536就自自然成為一個回味的股票號碼