簡單評價長建業績

終於都黎到同大家去睇下長建最新一年的業績。

以下所有圖片﹐如無特別標示﹐都係來自長建2017年【二零一七年年報】(連結)


近呢幾年﹐長建份年報一開始都會展示下面呢幅圖:

無他﹐係香港可以上市後股息每年都增長﹐除左佢外就只有領展(823)

(圖表至2017年﹐而2018年兩間都繼續增長

來源:蘋果日報 連結)

(PS:長建如果可以再保持紀錄多4年就會成為一隻紅利貴族(表示公司保持廿五年增加股息派發)﹐相信將會成為香港第一隻的紅利貴族)

而第二個表就會係以下:

Blog主睇完個表就即刻發現要深入了解其中兩部分

一係負債總值﹐好明顯係有借貸去收購公司﹐所以表上的聯營公司權益同合資企業權益都比16年大左唔少

二係流動資產﹐比16年有所下降

而主席大仔也都一開始就講左17年係"收購頻繁的一年"

收購當中最著眼當然係DUET﹐因為係長建歷來最大單的收購。DUET係一間澳洲上市的能源企業公司﹐當時長建係仲要聯同長實地產（1113）同埋電能實業（0006）一齊用左大約四百二十幾億港幣去收購﹐長建同長地佔四成﹐電能佔兩成﹐由金額計都已經可見收購規模係幾大。

係以前﹐長建的業務主要係英國同埋澳洲﹐但近幾年已經開始向其他歐洲國家出手﹐最新就包括以德國為主要市場的能源企業ista(Blog主屋企就唔係用佢)。

長建股價一直都落後大市﹐其中一個原因就係因為佢有唔少業務係英國﹐會因英鎊受到脫歐的不明朗因素下跌而令長建係以港幣結算的收入下跌。可幸的係英鎊已經開始有止跌的現象﹐當然要去番以前講緊14,15算就仲有好一段距離﹐但止跌回升對於長建收入無疑係一件好事。

英鎊兌港幣匯率走勢﹐已經由低位升番近一成半

(PS:去留學或者旅行就當然壞事)

(來源: Yahoo Finance 連結)

大數

首先係營業額﹐可以見到英國貢獻超過一半﹐比16年營業額相近﹐而澳洲、歐洲大陸同加拿大及美國都比16年增長唔少﹐相信就係由於新買的資產已經為長建帶黎貢獻。

而係溢利方面﹐來自英國的就比16年跌左超過一成半﹐年報都有指出受到英鎊影響同埋16年有稅項收益。暫時市場都對英鎊的前景已經比16年脫歐時好好多﹐相信下年會無左呢個不明朗因素。但要留意的係英國的業務其實已經係好成熟﹐將來都未必再有大的增長﹐再者長和集團係英國已經擁有唔少公用事業資產﹐要再買資產而又過到英國反壟斷部門的機會唔會好大﹐之前長和已經係收購O2時受英國反壟斷部門要求調查。英國業務係長建所佔的比例相信係不斷買其他國家資產下只會不斷下降﹐當然相信長建管理層都希望減少再受英鎊而影響盤數的機會。

而長建將來的增長來源好肯定係來自澳洲。17年的溢利比16年剔除出售公司後的溢利升左超過六成﹐而且DUET只係為長建提供大約半年的貢獻﹐係黎緊18年就可以為長建提供全年的收入貢獻。只係今次就到左要擔心澳紙的價格﹐澳紙近年都受到鐵礦石價格下跌的影響﹐令澳紙係近年的低位﹐間接影響長建的收入。

(來源: Yahoo Finance 連結)

融資,負債

另一樣野要講的就係長建的融資同負債﹐而今年﹐可以話係比盈利更需要重視。

長建今年買左咁多資產﹐唔使講都會估到有部分係靠借錢﹐仲有的就係靠長建其中一間聯營公司好慷慨的派息。

就咁睇長建現金好似只係少左廿億﹐但細睇就知唔止咁少。長建係17年就用左360億去收購資產(36後面加9個0.......)。咁D錢點黎？首先就業務帶黎30億現金流﹐之後長建就融資部分額外多左近15億﹐包括發債同埋發永久資本證券﹐用埋上一年剩落黎的現金118億﹐再加上以下呢一項:

熟悉長和架構而又有留意新聞的話一定會知係咩黎

(來源: aastock 連結)

電能貴為長建一部專屬提款機﹐近年以派特別息為名為長建不斷提供大額現金﹐等長建可以不斷係海外收購資產。17年每股電能就總共派左15.32元股息加特別息﹐長建係17年因此就袋左近128億股息。而電能係今年3月又開啟部提款機﹐每股派總共8.03元股息加特別息﹐長建到時又會多左大約67億(PS: 長和系的關係可以留番下一次再分享比大家)。可惜的係呢67億好大機會會係用黎還債﹐因為長建17年底有109億流動負債﹐姐係要一年內要還﹐除非長建將佢續期甚至變成更長期的債務。而長建的總負債比16年升左一倍有多﹐去到350億。

如果去到而家你都仲未知長建負債情況變差左幾多﹐又或者已經比數字搞到好亂﹐咁就可以剩睇以下呢個表:

淨負債由16年佔長建淨資本由唔夠5%急升到17年的17.6%﹐對上一次咁高比例已經要數到2000年﹐好明顯的就係長建今年可以話係借得就借﹐用盡一切去收購。長建今年發行左五億幾的永久資本證券﹐利率為4.85厘。如果以呢個利率去計算所有非流動負債的利息支出﹐長建一年的利息支出就已經去到接近12億﹐將會比16年多左一倍。

睇到呢幅圖﹐Blog都有D擔心長建的負債係未一個潛在問題

(來源: 2017 Annual Results Investor Presentation 連結)

將來

長建經過今年的大手買貨後﹐長建可用的錢可以話係無﹐除非真係搵到好靚的貨﹐咁的情況下長建首先要再發永久資本證券甚至再借錢﹐而且都好有可能會再搵長地同電能一齊買左先﹐之後再拆件。因此預期長建短期內都唔會再有新的收購﹐會首先將新買的資產提升收入﹐為公司貢獻穩定新資金來源先會出手。

要去計長建新買三間企業係17年的收入﹐竟然要去睇長地(1113.hk)的業績報告。長地之前都一直只係做物業銷售同租務﹐今次長地的收購將會同本身的業務分開﹐咁就可以計到呢三單收購係17年有幾多收入。

首先係講長建長地電能係三間公司的持股比例:

長地 長建 電能 Duet 40% 40% 20% Reliance Home Comfort 75% 25% 0% ista 65% 35% 0%

之後就係睇每間公司的收入同溢利(點解只係長地列出而唔係長建份年報都列出埋呢......)

(來源: 長實集團 2017年報  連結)

係長地的年報指出基建及實用資產業務的收入有54.8億 (7057M x 0.4 + 1684M x 0.65 + 2087M x 0.75 = 5480M)﹐溢利有19.7億。呢個數就係屬於呢三間公司係長地的貢獻。

咁姐係話長建係17年係呢三間的收入同溢利就分別係39.3億同

15.7億。DUET就屬於長建大約7個半月﹐Reliance Home Comfort係七月中開始入賬﹐ista就十月先開始。照咁推算足一整年的話長建就會有93億收入同31億溢利。不過要留意的係呢到假設本身業務無增長的話頭雖然機會都幾低)﹐到最後長建係18年的收入預測就會有354億。

而係長建提款機---電能方面﹐暫時18年會派171億股息﹐派完之後就會剩番大約74億現金﹐電能係17年營運所得的資金有11億﹐比16年多五成﹐如果用呢個升幅去估18年營運所得的資金就會有17億。咁姐係話電能18年底就會有91億﹐大約姐係每股有4.3元現金﹐呢個數仲未扣除中期業績會派的股息﹐17年就派0.77元。所以長建最多只可以再期待電能係今次特息後可以再得到35億。咁到時電能就可以話完成佢作為提款機的任務。Blog主好相信到時就僧會係電能任務完成﹐會再次比長建提出收購。有咁的想法係因為長建同電能一直都有唔少項目重疊﹐兩者合併可以更加壯大長建的基建皇國﹐而且合併可以減少兩者的營運開支。

前景

長建一直所買的資產﹐好多都係受管制行業﹐受政府監管﹐護城河唔差﹐部分仲可以按通漲去加價﹐收入會有保障。而且大多的業務的管制都係長年期﹐收入主要來源英國同澳洲的管制協議都係2020年後先到期。近年長建股價一直都係低位﹐令到息率去到一個吸引水平。Blog主希望可以盡快見到股價重拾上升動力﹐並且成為一隻紅利貴族

**************************

今次的簡單評價就到呢到為止

Like + Share
可以的話仲可以click下廣告﹐等Blog主賺到三幾幾蚊

戴頭盔時間

本人並非持牌人士，本人意見純屬分享。本文章不應視為任何投資之建議或邀請，投資涉及風險，如有疑問請諮詢專業投資意見