Blog主持倉（二）

下一隻要講的股就係好多香港人每日都要比錢用佢服務的港鐵（66）。好多人都知港鐵已經唔再係單純一間交通運輸公司，好可能你平時去開的商場甚至乎你住的屋宇都係由港鐵的物業管理公司管理。

根據2016年報，港鐵全年度收入為452億，增加8%，收入當中大約四成係黎自香港客運業務（176億），姐係票務收入，按年增加4.4%，如果剩計算本地客運就上升左4.9%。16年港鐵加左一次價(2.7%)，可以推測到唔單止收入因加車費而上升，而且都因客運數目上升。

來源:港鐵2016年年報

連結

由上面幅圖可以見到，港鐵乘客數目其實年年都增加緊，所以點解大家搭港鐵越黎越逼就係咁解。咁點解乘客數目多左，其中一個原因係因為港鐵不斷延伸同埋新的路線，包括港島線同觀塘綫的延伸，同埋南港島線投入服務。

另一個主要的收入卻唔係屬於香港的業務，而係國際業務（126億，28%），當中包括墨爾本、英國同埋瑞典，收入黎自營運同埋維修專營權。同香港的鐵路唔同，港鐵係外國的業務只係以競投方式獲得專營權去管理，專營權一到期而港鐵又唔能夠競投到的話就會無左個管理權，英國其中一個業務已經因為咁而係一六年尾交還業務，呢一點就成為左國際業務其中一個風險，幸好的係專營權期限都以數年至十幾年不等，而且港鐵係營運鐵路方面有幾十年經驗，外國地方政府都樂意同港鐵合作，港鐵近年都不斷競投外國營運業務。早前有線財經有特輯介紹港鐵係歐洲的業務，有興趣可以去睇下。

16年年報收入當中有一個突出地方，叫做“中國內地的物業發展附屬公司收入”，姐係咩？賣樓收入lor。係邊？好近，深圳，項目叫“天頌”，位置於龍華線龍勝站，係港鐵首個發展加管理的住宅項目係16年尾入伙，因此收入都開始係16年入帳。16年年報入面收入有13億，。大部分單位都係17年上半年入伙，導致到17年上半年係呢部分的收入已經去到68億。咁當然可以預期下年唔會再有咁大的收入，但港鐵呢種係地鐵站旁邊起樓的模式，相信將來一定會繼續。

講左咁多收入部分，係時候講港鐵的風險，第一，也都可以話係主要風險，就當然係條高鐵，分為兩部分，一部分係支出，另一部分係借貸。支出方面，由於已經同政府協議左造價將會封頂為八百四十四億，如果額外的支出將會由港鐵承擔，到左而家都仲未可以確實到總支出為幾多，最後埋單港鐵使唔使填數，仲係未知之數……

相反，借貸部分就已經成事實……

16年年報當中有一段講述左港鐵同全球21間銀行簽訂左二百五十億貸款，話會用黎一般企業用途，姐係咩？睇埋下面單新聞就知

高鐵超支　港鐵加碼借貸250億

來源:蘋果日報

由於呢一筆的借貸，令到港鐵的負債升左近二百億去到一六年尾的近四百億。當然以港鐵3個A的信貸評級，借錢可以話係無難度，但利息支出就肯定有所上升，17年上半年度年報已經反映左出黎，利息支出由16年上半年度的6.9億升左20%去到17年上半年度的8.3億。而且港鐵當中有一半的借貸係以浮動利率計算，再者有四成的借貸都係五年或以後先償還，美國黎緊幾年只會有加息無減息，港鐵將來的利息支出可以預計只會繼續上升。

另一個風險就係港鐵的將來增長，港鐵佔有率已經去到近一半，增長能力除左加價/加租外就係繼續靠海外的收入，可惜的係海外的收入大多都唔好似香港部分能夠長期維持（例如賣樓或者經營權，會受外來競爭者爭奪），港鐵保持收入穩定相信無咩難度，但增長潛力就成問題，當然收入穩定都令港鐵可以繼續派發股息，成為一隻收息股