今日會講的係第一大持倉，長江基建集團1038 （簡稱長建），相信有睇之前文章的話都經常見到Blog主用佢做例子
作為長和系的公司，已經可以知道佢係一間綜合企業的公司，主席係李嘉誠的大仔李澤鉅。集團主要投資於英國、澳洲、新西蘭、加拿大以及中國內地，以及持有另一間上市公司電能實業，其中英國業務已經成為長建的主要投資地點，包括輸電 UK Power Networks (40%)，供水及污水處理 Northumbrian Water Group Limited (40%)，輸氣 Northern Gas Networks Limited (88.4%) 等的業務。而其他的業務大多都係與公用業務有關，例如廢物管理、鐵路公路收費等。由於呢d業務都可以穩定提供收入，令到長建可以容易預測收入，預留資本作為投資後可以以股息派回比股東。長建係過去廿年，每一年都增加派息金額，由初上市時（1996年度）每股派0.16元，到而家（2016年度）派2.26元，係香港少有的一間上市公司。
近排長建的股價一直都輪比大市，主要原因係因被指長建主要收入係黎自英國，會受到英鎊下跌而導致的匯率損失，同埋指出長建係英國的公共業務增長減慢，而英國脫歐的問題都一直影響長建的股價。長建都開始發覺到問題，開始收購其他國家的業務，包括加拿大及新西蘭，而且長建增長派息的政策短期內唔會有大改變，係一隻值得極長線持有的股票
請問14年長建是否有重要資產出售？我看它每股溢利多了很多。
回覆刪除因為長建持有電能實業,而電能分拆港燈上市帶來溢利,所以長建當年溢利特別高,特殊溢利大約係一百九十六億
刪除明白了，謝謝解釋！
刪除假設 成個倉都買齊長和系股各一手, 是否明智? 會否重複購買相同行業(撞股)?
回覆刪除還是係長和系中揀有潛力(低水位)ge股作長線使到溢利更大?
長建比我感覺係市升跟唔到, 跌就大跌, 呢個時候就只有睇行業闊窄, 望長線持續收息?
假設 成個倉都買齊長和系股各一手,是否明智?
刪除唔建議咁做,原因有二
一(一般情況),投資應該要分散風險,同一系的股有機會共同承受同一個風險,例如key man risk(唔知中文應該點譯),地域風險等
二(尤其長和系),同系公司多數都會持有同系股票,如果各買一手,其實最後你買左的唔少都會重複。其實呢個都係點解長和系一直都進行重組,其中一個原因就係想業務更加清晰
(根據aastock,長和持有38.87%電能,76.87%長建,33.37%港燈;而長建又持有38.87%電能,33.37%港燈;最後電能又持有33.37%港燈)
另一例子係恆地系,恆地持有41.52%中華煤氣,64.12%港華燃氣;而中華煤氣又持有64.12%港華燃氣
長建比我感覺係市升跟唔到, 跌就大跌, 呢個時候就只有睇行業闊窄, 望長線持續收息?
首先可以睇下下面條link,來源:webb-site
https://webb-site.com/dbpub/ctr.asp?i1=49&i2=5295&rel=0&d1=2013-01-02
幅圖顯示出長建同盈富基金(接近等同恆指)五年回報,可以見到長建跑嬴盈富基金16%
投資呢D收息股其中一個問題就係會經常覺得好似輸比大市,但其實事實並唔係咁,可能係短期大市升個陣唔會跟足,但係如果拉長時間黎睇就會發覺其實唔係跑輸,好多時仲會因低波幅而到最終會跑羸大市