投資產品：股票(續3)

上一回講到，一間target為收息股的公司，除左股息年年有上升外，公司的盈利都上升都好重要。咁有咩公司會target為收息股的公司？

有幾類型的公司，會被市場認為穩定收息的對象，簡單數的話有以下幾類：



一：公用股
屬於公用股的公司，會提供一個人日常生活必須的服務，例如水、電、媒。由於每個人每一日都需要用到佢的服務，咁姐係話每個人每一日都比緊錢間公司以換取公司提供的服務，間公司的收入就會有保證。而呢D公司的支出就會較為穩定，因為提供呢D服務的公司最主要的投資都於公司前期階段，後續的支出較為可控，因此公司的盈利靠為穩定，而又因為支出都能夠預測，公司就可以將剩餘的現金以股息派比股東，造成穩定的派息。另一方面，呢D公司通常都唔太受環境經濟影響（姐係話無論個經濟好好，好似九十年代香港經濟起飛，定係經濟好差，例如沙士，呢D公司的收入都唔會大幅減少（唔通唔用水電媒咩？）），因此可以長期提供股息，適合已經無收入來源，例如退休人士作長期持有
例子：中電控股 2.HK ，香港中華煤氣 3.HK，港燈—SS 2638.HK

二：地產股
地產股，聽個名就知係講緊一堆地產商，佢地透過起樓，賣樓去賺錢。但其實好多香港的地產股，其業務都唔單止係地產，仲會有其他的業務，例如商場或者寫字樓收租，物業的管理，甚至係與地產無關的業務。
舉個例：新鴻基地產 16.HK

來源：2015/2016年報

http://www.hkexnews.hk/listedco/listconews/SEHK/2016/1005/LTN20161005471_C.pdf

由第一行睇到（本公司及附屬公司收入），新鴻基地產有大約四成的收入係黎自物業銷售，其他就黎自物業租賃以及其他業務，當中電訊部分都佔左近兩成（邊一間電訊？等大家去搵下，又或者留言問我）

地產股中的物業銷售（姐係賣樓）收入其實同整體社會的經濟以及樓價好有關係，經濟好、樓價高（姐係而家咁…）賣樓的收入就會高；相反，經濟差，樓價跌，就自然賣樓收入少。因此地產公司了解到唔可以只係靠賣樓，要靠其他業務去keep到穩定收入，所以地產股當中有唔少的收入都係較為穩定，以避免公司的收入大上大落。

例子：恆基地產 12.HK，新鴻基地產 16.HK，新世界發展 17.HK，長實地產 1113.HK

三：收租股

個名都話左你知公司業務係咩，就係收租。

地產代理公司的經紀都係咁同你講

咁但係點解會出現呢個情況？
收租股可以再以收租的物業去細分，大概分為民生，商業，酒店

民生的代表就當然係領展房產基金 823.HK，仲有就係置富產業信託 778.HK。呢兩間都係持有一般普羅大眾日常會去的商場，透過租出商舖而賺取收入，而領展就仲持有唔少的車位以作出租。呢類型的公司所持有的物業大多都接近民居，而且佢地的商戶大多都係主打日常的商戶，較容易租出。而且佢地會不斷透過翻新以及改善管理，以吸引更多的人流前往，藉此帶動消費，再從而提高租金。

商業就係持有商業大廈，包括高級商場及寫字樓，香港唔少的收租股都係主打商業，包括陽光房地產基金 435.HK，太古地產 1972.HK、冠君產業信託 2778.HK。由於佢地持有的物業都係位處於商業區，佢地主打都係商業客戶，甚至係高級商業客戶。好多時收租公司同呢D客戶簽的合約都係長年期，因此收入可以預測。另外因為呢D公司的物業都較為高級，作為金融中心的香港，市場對呢D物業的渴求係好高，令到收租公司可以有加租的能力

酒店就當然係持有酒店，透過持有酒店再租比住客。相比上面兩種，酒店的收入就無咁穩定（人地的租約係起碼兩三年，邊有住客會住兩三年）
例子：富豪產業信託 1881.HK，朗廷—SS 1270.HK


四：綜合企業
話明綜合，就姐係咩生意都有，但不同生意當中會有以下共通點：收入穩定，長年期回報，支出可控。呢類型的公司由於業務廣泛，導致到收入唔會咁容易大上大落，而支出好多時都只係需要前期的支出（例如基礎建設，運作前準備），後期支出較少，再加上會長時間帶黎收入，導致公司可以穩定派發股息

例子：長和 1.HK，九龍倉集團 4.HK，太古股份公司Ａ 19.HK，長江基建集團 1038.HK


咁除左以上個四類，係未其他就唔係收息股？

當然唔係

要知道仲有好多的股票都擁有收息的特質，之後再講下其他的收息股



戴頭盔時間

本人並非持牌人士，本人意見純屬分享。本文章不應視為任何投資之建議或邀請，投資涉及風險，如有疑問請諮詢專業投資意見