圖片說故事

VIX再次去到50

美國Yield curve一年變化

希臘10年債息

美國長債ETF今年價格變動

中石油宣布天然氣進口遭遇不可抗力

期油今年價格變動

短評

好耐無係到update﹐更加好耐無寫過長文﹐唔知到底仲有幾多人有睇呢個Blog
近呢幾個月都因為返左實習後忙左好多﹐都無咩時間去寫長文。本身仲寫緊一直都拖住的恆地(12.HK)﹐但到左而家都已經要重新再寫過。

2020年﹐當各香港人都希望會更好個陣﹐點都估唔到17年前的事件又再發生﹐而香港係比17年前表現更加荒謬。身處海外的我﹐當開始知道又有可能爆發類似沙士﹐香港已經係到開始搶口罩﹐搶口罩呢樣野係17年前係無咁嚴重。而當我屋企人都問我呢邊有無口罩﹐就已經知道有幾嚴重﹐最後都寄左一箱速遞返香港。

而香港的經濟就係仲未有好轉的情況再受打擊﹐好肯定嚴重過03年沙士。當年過左dot com bubble 後都有短暫的回復先至到沙士﹐今次係完全雙重打擊﹐而且香港的經濟就比以前更加依賴中國(好大程度就係因為沙士後推行的自遊行)。服務業死晒﹐就算其他行業都因為不同程度的後備方案而影響(唔少friend係農曆新年後都無返過公司)。可能有D人唔記得﹐但沙士後其實香港都受過幾次疫症影響﹐例如豬流感﹐當年一下子封左間酒店隔離7日﹐好多人話反應過敏﹐但起碼香港唔會好似而家咁個個2盒tax

股票方面﹐大家係時候留意番自己的股票有無機會受到影響﹐到左3月相信唔少都會出通告指出個影響﹐首先就當然係隻國泰(293.HK)。上年買左快運﹐仲諗住攻打廉航﹐點知而家整個航空死晒﹐相信國泰近排的炒人仲未夠﹐但點炒都唔會對盤數有咩實質幫手。

另一行業就係能源股﹐好似港華燃氣(1083.HK)﹐而家中國已經停晒工業﹐港華燃氣有一半係供應比工商業﹐售氣量會受到打擊。

間接類股就當然有零售收租股﹐有睇新聞都知已經要減租留客。

最後要講的係九倉系﹐之前有寫過九倉分拆﹐到左今日就終於等到第二步﹐但呢一步就相信好少人估到(Blog主都估唔到﹐睇番各大報紙都係無一個有估中)﹐因為竟然係吳光正家族私有化會德豐﹐而市場(包括埋Blog主)到停牌個陣都係估會德豐收購九倉﹐分拆九置就係為左會德豐唔使食整間九倉咁大件。Blog主仲未睇過個deal﹐但經過有線一彼﹐相信一定唔會係對小股東公平﹐大家可以繼續睇戲咁留意發展(相信都無咩人會持有會德豐)。

Like + Share

戴頭盔時間

本人並非持牌人士，本人意見純屬分享。本文章不應視為任何投資之建議或邀請，投資涉及風險，如有疑問請諮詢專業投資意見

2019年香港大事回顧(不包含逃犯條例版)

曾經問過朋友﹐如果要你做一個2019年香港大事回顧﹐但唔包括同送中條例有關的新聞﹐你會點做

諗左好耐我都諗唔到有咩其他的新聞﹐最後睇番蘋果昔日先至記得番D

以下為部分我搵到較為重點的新聞:

來源:蘋果 https://static.appledaily.hk/images/e-paper/20190627/large/1561636504_ef2a.jpg

沙中綫造假

港鐵行駛中列車相撞

戴耀廷, 陳健民, 邵家臻, 黃浩銘佔中判刑

旺角騷亂判刑

黃台仰, 李東昇在德國獲難民庇護

鄭若驊無申報物業

豬隻發現非洲豬瘟

曾蔭權獲終審法院裁定上訴得直

港鐵撞石屎躉出軌

羅家聰「被離職」

今日見到呢單新聞﹐其實並唔係咩突發野﹐也都唔係咩咁驚人﹐因為根本一直都發生緊﹐只不過係個主角出名所以先至引起話題。

羅家聰稱「被離職」或與過往涉反修例言論有關　

(來源: RTHK) 

因為Blog主屋企有裝到有線﹐因此周不時都會見到羅家聰(簡稱KC)做節目﹐一直睇開佢都係交銀的首席經濟師。而到左今日金融時報就有佢的訪問﹐被指因為同交銀的合作空間唔再存在﹐因此被離職。

銀行或者金融業根本一直都係到換緊血﹐開頭中資一直都搵本地或者外國人坐鎮﹐因為上面根本就無咁的人才﹐90年代初有唔少的香港人幫手北上發展金融業。但到左而家唔少的中國海歸完左學業就入呢D中資直接坐正。佢地可能只係有學歷而無實際經驗﹐而且做事手法都同香港人或者外國人完全唔同﹐因此唔少做左好多年的人都被迫離開。有D就去左做FinTech﹐而有D就直接離開香港。

KC呢類極高層的職位除左大貓或者少量外資投行之外﹐中資根本唔會再有本地人出現﹐全部都係空降﹐係咁的情況下間公司的管治都會同上面掛鉤。好快唔止呢D高層位﹐連中層的位都只會係由上面的人做。

之前就唔比分析師唱衰中國的經濟﹐而家就因言論方向不同而被離職﹐咁你可以諗下將來香港的金融業會變成點﹐好快遲下返工第一件事要做的就係唱國歌(唔係願榮光歸香港)

一隻股一日可以跌幾多

 一隻期權﹐一隻牛熊可以一日就死﹐但原來一隻股都可以一日內跌過九成半
今日香港的股票市場又衝出國際

https://markets.businessinsider.com/news/stocks/artgo-worlds-best-performing-stock-98-percent-price-drop-2019-11-1028708885

講緊的係3313雅高控股




仲可以有咩講﹐只可以食花生
引爆個炸彈的原因就係因為入唔到MSCI中國指數

http://www.aastocks.com/tc/stocks/news/aafn-news/NOW.977750/1