國泰三月數據+預測

正如上一篇所講﹐想睇下國泰三月情況會係點。今日就出左數據﹐當然就好嚇人﹐更嚴重的係國泰自己講左係四月十二號呢個禮拜中有一日載客量只係302人﹐對Blog主黎講係一個諗唔到的數字﹐姐係一架巴士一日載客量都多乘客過國泰整個機隊。

下面幅圖就係三月同埋YTD的數據

來源: 二零二零年三月份客、貨運量數據

第一樣野就睇到到底好幾恐怖﹐客運YOY就跌九成﹐真係靠外國回港的學生頂住﹐中國同埋東南等同死晒。
第二樣野就國泰已經將可載客量cut左七成﹐但係運載率都仲只係唔夠五成﹐姐係話,仲有一半架機係空﹐慘不忍睹。
最重要的一樣野係內文到

在四月和五月，我們只會營運少數基本的客運航班，相當於正常運力的 3 %。

簡單黎講姐係無客運﹐得番貨運。但係貨運都係要跌三成半﹐而且唔少貨運都係用客機載貨﹐而家無客運就會連累埋貨運。

Blog主而家擔心的係國泰到底有無錢營運落去﹐因為已經係無晒客運收入﹐而且旅客不斷取消機票﹐對佢的現金流好有影響﹐有無錢還債都成問題。


以下黎個簡單的計算:

19年國泰加港龍客運收入720億﹐佔所有收入的七成﹐貨運就210億。假設個收入係每一個月都係咁的表現﹐咁一個月客運收入60億﹐貨運就18億。2020年三個月的客運:一月大約持平﹐二月跌六成﹐三月跌九成﹐而四五月就跌九成七﹐假設埋六月好好彩只係跌七成。咁大約上半年客運收入就只係得番112億。再假設埋因為大需求國泰可以加到五成票價﹐都只係168億。

貨運方面﹐一月跌5%﹐二月跌7%﹐三月跌三成﹐假設剩番三個月都係跌三成﹐再計大五成收入﹐咁個收入就會係124億。
姐係話﹐國泰加港龍上半年客貨運收入就只係292億。

集團19年係營業帶黎的現金流有185億﹐係總收入的17%﹐用呢個比例去計的話咁上半年的現金流就有5億。

集團19年流動資金有149億﹐再加上信貸最高可以去到204億﹐但係20年到期的債就有415億。

姐係話本身已經唔夠現金流還2020年的債﹐而家再加埋上半年得番幾億的現金流﹐好肯定國泰會有事情發生﹐最簡單未延長債務﹐又或者再問銀行借。但咁的時勢仲有幾多銀行肯借。因此Blog主認為會出現以下其中一個事情

1. 要供股﹐但係大股東太古自身都難保﹐係石油業務都蝕唔少
2. 賣左手上的國航﹐國泰而家手上有國航18%股權﹐值41億

當然以上兩個option都係好大膽的預計﹐但國泰唔似其他Flag Carrier的航空公司有政府出手補助﹐頂唔頂到個疫情係一大問題。